Maliddangan pay laeng iti nabati a pamilya dagiti agkasinsin nga pimmusay kalpasan dagitoy nga nagaboran ti daga iti ar-aramiden dagitoy nga bubon idiay Barangay Ili, Sur, San Juan, La Union.
Iti pannakiuman ti Bombo Radyo La Union kenni Maricris Lorenzo, panginaen ken tumaktakder nga ina ti maysa kadagiti pimmusay a ni Elvis Lorenzo kinuna na a nalidliddaang iti napasamak kadagiti agkasinsin nga kaanakan daytoy.
Kinuna nga iti kinabayagen nga agar-aramid iti bubon dagiti kaanakan na ket daytoy iti umuna a pasamak kadakuada nga ibilangda a nakakaskas-ang.
Segun kenkuana, maibasar iti naobserbaranda a rescue operation ket ibilangda daytoy a nabuntog no sadino agpada a naiddepen ti dua a backhoe gaputa naawanan dagitoy iti gasolina.
Binabalaw na pay ti ambulansya nga adda idin iti lugar nga awan iti simmurot nga nurse ken uray oxygen iti lugan nga nangtulong kuma para iti panaganges dagiti biktima.
Kinuna na a saan daytoy nga pulos a pimmanaw iti lugar kabayatan nga kitkitaen ken ur-urayen na ti pannakaalaw iti bagi dagiti biktima no sadino naudi a naiyanon ni Elvis nga nagpaot iti siam nga oras.
Innayon na pay a no laeng kuma naipamaysa kadagiti kakadua dagiti pimmusay ti retrival operation nga ar-aramiden dagitoy ken saan nga naipawil kadakuada nga aramiden iti panagmano-mano ket sibibiag pay kuma da Henry Benavidez, 29-anyos, residente ti Brgy. Calumbaya, ken ni Elvis Lorenzo, 30-anyos, residente ti Brgy. Nagrebcan, Bauang, La Union.
