LA UNION – In-inuten a mapal-palukayan dagiti restrictions gaputi COVID 19 a maipatpatungpal idiay Hong Kong kalpasan a nagsublin iti regular a panagtrabaho dagiti empleyado iti naduma-duma nga opisina ti gobyerno, manipud iti dati a 2-3 days laeng a panagtrabaho iti makalawas.
Daytoy iti impadamag ni Bombo International Correspondent Emily Miranda manipud Hong Kong.
Kinuna na a nangrugi idi Setyembre uno, ket nagsubli metten iti regular a panagtrabaho dagiti mangop-opisina.
Uray kadagiti pasdek negosyo kunana ket naglukat da metten, ngem limitado pay laeng iti sumrek a mangmangged iti sumagmamano kadagiti business establishments.
Nupay kasta, nagbalinen kuna ni Miranda a sistema iti inaldaw-aldaw a panagbiag, iti panangaramid kadagiti minimum health standards tapno maliklikan ti deadly virus, kas koma iti panagsuot ti face mask, panagdalus ti ima babaen ti nadalus a danum wenno alcohol ken social distancing.
Impadamag na pay a posible nga iti maudi a lawas ti Setyembre wenno inton Oktubre ket maisublin iti face-to-face a klase dagiti estudyante.
Kabayatanna, impadamag ni Miranda, a nasurok 2,000 nga Overseas Workers (OFWs) iti napukawan ti trabaho idi laeng bulan ti Agosto, base iti record ti Labor Office.
Kinuna na a sumagmamano iti nasao a bilang ket pinoy workers a nakaawiden ditoy pagilian bayat a dagiti dadduma ket pinili da ti agtalinaed idiay Hong Kong ken agtultuloy nga agsapsapol iti mastrekan a trabaho.
Sipud idi timpuar ti pandemya idi bulan ti Marso, addan iti nasurok a 10,000 overseas workers iti napukawan ti panggedan gapwanan ti pandemya.
