LA UNION – Papigsaen manen ti City Government of San Fernando iti naduma-duma a programa na ditoy syudad kontra iti sakit a dengue nangruna ita a tiempo manen ti panagtutudo.
Daytoy ket tapno maprebentaran ken maprotektaran manipud iti nadakamat a sakit iti komunidad.
Karaman iti isaysayangkat ita nga aktibidad ti City Health Office ket panag-inspect ti city sanitary kadagiti stagnant water ken panangisayangkat ti water sampling manipud iti naduma duma a barangay, nangruna dagiti lugar a makailislista iti nangato a kaso ti dengue.
Rinugyan payen ti CHO a dalusan dagiti kanal ken wastewater, panangikkat ti danum kadagiti plastic bottles, pilid, ken dadduma pay a container a posible a pagitlogan dagiti lamok nge aedes egypti.
Agtultuloy met iti panangispray iti anti mosquito fogging solution kadagiti uneg ti pagtaengan dagiti residente ti tunggal barangay ditoy syudad.
Karaman kadagiti immuna a barangay a tinurong ti CHO ket ti Brgy. Bato, Bangcusay ken Tanqui bayat a nakaituding met a maisaruno a mainspeksyon ti Brgy. Pagdalagan ditoy syudad ita nga aldaw ti Biyernes.
Ikagumaan ti lokal a gobyerno a maibaba ti kaso ti dengue ditoy syudad babaen iti panangimplementar dagiti naduma duma a programa kontra dengue.
Base iti datos manipud iti CHO, adda ti 53 dengue cases ti nailista ditoy syudad sipud idi Enero agingga ita bulan ti Hunyo.
Nangatngato daytoy nu idilig iti 18 a kaso ti dengue ditoy syudad idi kapada a period idi napalabas a tawen.
Al-allukoyen met iti City Government dagiti residente ditoy syudad a linisan da dagiti aglawlaw ken iti bukod a pagtaengan nangruna kadagiti addaan ti stagnant water tapno awan ti pagumukan dagiti mosquito dengue carrier.
