Nangisayangkat coastal clean-up wenno panagdalus iti igid ti baybay idiay Barangay Lingsat, San Fernando City, La Union dagiti kameng ti San Fernando City Police Station.
Iti aktibidad ket paset pay laeng iti 5 Focused Agenda ti pulisya ken kas pannakarambak ti maika-28 a Police Community Relations Month nga addaan tema, “Serbisyong Nagkakaisa Para sa Ligtas at Maunlad na Pamayanan.”
Nakitinnulong ditoy ti Philippine National Police FTP Class SAKTIBAY, Regional Finance Service Office ken dagiti KKDAT Members.
Partikular a pinidot a wara dagiti otoridad iti igid ti baybay ket dagiti plastik, barbecue sticks, rungrung ti sigarilyo, daan a pilid, botelya, badbado, bittak a bote, diapers, ken dadduma pay.
Pinaregta ti San Fernando City PNP ti publiko nangruna dagiti agbi-biyahe ken agnanaed nga asideg iti coastal areas nga agbalin a pagwadan iti bukod a wagas ken agaramid iti nasayaat babaen ti panagbalin a responsable kadagiti bukod a basura tapno makatulong iti panang-patalinaed a nadalus iti kabay-bayan ti San Fernando ken maliklikan ti pollusyon iti danum.
