LA UNION – Agrekreklamo dagiti residente gapu ta awan iti naaramid a kalsada nga agturong iti karayan ken kadagiti babbalay kalpasan a nalpas a naaramid ti baro a “Ribsuan bridge” idiay Barangay Old Poblacion, ili ti Burgos, La Union.

                            

Iti interview ti Bombo Radyo iti maysa kadagiti agindeg ti nasao a lugar a ni Sammy Lomboy, kinunana a dakkel unay iti epekto iti pagsapulanda nga agkakabarangay kalpasan a saan a pinatgan dagiti kameng ti Department of Public Works and Highways (DPWH) Regional Office-1 ken ti kontraktor iti kadawatan dagitoy a maikkan met laeng ti kalsada manipud ti ngato a paset ti rangtay nga agpababa iti karayan ken isu metten iti agpaay a dalan iti lugan dagiti residente nga agturong iti bukodda a garahe.

Iti agdama sigun kenni Lomboy, mariknan iti rigat dagiti agindeg nga agdepdepende ti pagsapulanda iti nasao a karayan ti rigat gapu iti kinaawan iti magastus ti inaldaw a pagbiagan lalo ti pagpa-eskwela kadagiti ubbing, ken mapaliiw pay nga iti igid ti national road nga agparparadan dagiti addaan ti lugan.

Napateg unay kinunana iti kinaadda ti kalsada gapu ta agpapaay daytoy a dalan, saan laeng a para kadagiti residente sadiay no di ket uray pay kadagiti agindeg iti kabangibang a barbarangay ti Burgos tapno agala iti darat ken agsutdo iti danum manipud ti karayan lalo iti panawen ti kalgaw.

Impeksa pay ni Lomboy nga arigna a saan isuda nga inkankano ti project manager iti DPWH Regional Office-1 ni Eng’r. Alex Villanueva uray naiteden kadakuada ti surat a naggapu kenni Burgos Municipal Mayor Robert Madarang Jr., nga agkidkidaw iti pannakaaramid ti kalsada nga agturong iti nasao a karayan.

Kinuna pay ni Lomboy, a naipanawen iti lugar dagiti equipments ti kontraktor kalpasan a mailippas ti pannakaaramid ti rangtay.

                                                         

Kabayatanna, iti interview kenni Eng’r. Villanueva, kinunana a nagriri ngamin idi ti maysa kadagiti makinlote nga apektado iti proyekto isu a saan a naututuloy ti pannakaaramid ti kalsada ngem iti kamaudiananna ket immanamong met laeng daytoy.

Innayon pay ti project manager a nakasaritadan ti kontraktor a mangaramid iti kalsada para kadagiti residente ngem saanna pay a masegurado no kaano a mangrugi dagitoy.

Impanamnama pay ni Villanueva nga agsubli ti kontrator tapno mapatgan iti kiddaw dagiti agindeg sadiay a maikkanda iti kalsada. (Abs Flores)