LA UNION – Narigatan nga pimmanaw dagiti residente manipud idiay syudad ti Marawi nga agturong kadagiti evacuation centers ken kadagiti natalged a lugar gapu ti panagtalinaed dagiti kameng ti Maute Terrorsist Group sadiay.
Iti pannakiuman ti Bombo Radyo kenni Sultan Kamlon nga adda ita idiay Marawi City, narigatanda a pinanawan ti syudad gapu ti kinakurang iti lugan ken ti nabuntog a taray ti trapoko.
Sigun kenni Kamlon, malaksid kadagiti kameng ti militar ken pulisya ket mangisaysayangkat met ti check point dagiti kameng ti Maute Terrorist Group wenno ti aw-awaganda nga ISIS kadagiti naduma-duma a barangay.
Adda met ti maysa a gundaway a nakagtengda iti check point ti terorista a grupo ken kinasaritada dagitoy ngem pinalasatda met iti kalsada.
Kabayatanna, agtultuloy met a makikikoordinar ti La Union Muslim Community kadagiti kakabagyanda nga apektado ti engkwentro iti baetan ti gobyerno ken dagiti terorista idiay Marawi City.
Sigun kenni La Union Muslim Community President Allan Macapundag, maipagarup nga aglemlemeng kadagiti babbalay dagiti terorista isu a mabuteng dagiti kakabagyanda a panawan ti lugar.
Marigatanda met a mangala iti impormasyon maipapan ti kasasaad dagiti kakabagyanda gapu ta naputed iti suplay ti kuryente sadiay.
Umanamo met ni Macapundag iti panangideklara ti Martial Law ni Pangulo Rody Duterte iti sibubukel a rehiyon ti Mindanao tapno naanpanay a maparmek ti terorista a grupo a maipagarup a kaddua ti ISIS.
