LA UNION – Agrekreklamo dagiti residente gapu iti sumagmamanon nga aldaw a nakapenpen a basura iti igid ti national highway idiay ili ti Bauang, La Union.
Sigun kadagiti saanen a naiganagan a residente a nakauman ti Bombo Radyo, napenpenen iti adu ti basura gapu ta awan iti agkolkolekta a garbage truck manipud iti munisipyo lalo kadagiti barangay iti Disso-or, Bacuit Norte, Dili, Paringao ken Pagdalagan Sur iti nasao nga ili.
Kabayatanna, mapiliw met a gapu iti kinabayagdan a nakapenpen dagiti basura ket maiwarwaran dagitoy ken umayaumen iti nabangsit nga angot .
Iti met interview kenni Willy Castillo manipud iti Bauang Municipal Environment and Natural Resources Office, kinuna a kitaen ken tingitingenda a naimbag ti nasao a reklomo tapno maakop iti umno nga oras dagiti basura.
Inlawlawanag nga adda ti gundaway a maladaw iti panangakop kadagiti basura gapu iti pannakadadael ti dadduma a garbage truck. (Abs Flores)
