LA UNION – Mapagsasaritaan ita idiay ili ti Luna, La Union ken uray iti social media iti panangidatag ti certificate of candidacy (COC) dagiti retirado a military ken police officials.
Ittatay bigat, kaddua dagiti taga-suporta ket naggigiddanda a nagturong idiay Commission on Election (Comelec) ti nadakamat a grupo nga indaulwan da retired Police Inspector ken incumbent Vice-mayor Romeo Resurreccion a kandidato kas mayor; ken retired Col. Abelardo Garcia Jr. a tumaray kas bise-alkalde ti ili.
Ti nasao a bunggoy ket nabirngasan kas “Pudno nga Annak ti Luna” Team ket bukbuklen met dagiti kandidato para konsehal nga isuda retired P/Supt. Mario Ringor, 2nd Lt. Benedicto Navalta, P/Insp. Primitivo Estabillo, P/Insp. Edgardo Flores, ken P/Insp. Carlos Tampos Jr..
Karaman met iti nadakamat a grupo ken kandidato iti kinakonsehal ti retirado a kameng ti Department of Education a ni Cesar Higoy, sigud a Barangay Chairman Francisco Pony Aguinaldo, ken Atty. Romeo Camacho.
Kabayatanna, immunan a nangidatag ti COC iti agkaddua nga incumbent Mayor Vic Maroon a tumaray kas vice-mayor ken ni Rachel Pinzon a sumabak iti mayoralty race.
Naudi met a nangidatag ti kandidatura itattay aldaw idiay Comelec ti grupo da incumbent La Union Board Member Kit Ortega a sumabak iti mayoralty race ken incumbent Sangguniang Bayan Member Oscar Reyes a kandidato kas bise alkalde ti Luna.
