Nainget a kinondena dagiti sumagmamano a senado ti AI-generated video nga inruar ti state-run Chinese media outlet a China Daily, a maipagarup a mangiladladawan kadagiti Pilipino kas bakes mainaig ti maika-10 nga anibersario ti 2016 Arbitral Award sa West Philippine Sea (WPS).
Segun kenni Senate President Sherwin Gatchalian, awan ti lugar iti kritisimo ken aniaman a klase ti panangtagibassit iti dignidad ti tao, aniaman iti mapaspasamak a saan panagkinnaawatan iti nagbaetan dagiti pagilian.
Pinaregta ni Gatchalian dagiti media organization ken dadduma pay nga institusion nga ipangruna iti responsable a panagiwaragawag ken panagraem iti tunggal umili.
Kenuna met ni Senador Francis “Kiko” Pangilinan a nalawag a racist ken makapainsulto iti nasao a video. Nagpanawagan isuna iti gobierno ti People’s Republic of China a dagos nga ipaikkat iti video, agkiddaw ti pammakawan iti publiko, ken pagsungbaten dagiti responsable iti panangpartuat ken panangiruar ditoy.
Kabayatanna, inpaganetget ni Senate Majority Leader Migz Zubiri a saan a rumbeng nga agtinnag iti rasismo ken pananguyaw dagiti saan a pagkinkinnaawatan mainaig iti isyu idiay West Philippine Sea.
Kenunana, agtultuloy nga ilaban ti Pilipinas iti soberanya ken dagiti karbengan daytoy babaen ti linteg, kinapudno, ken diplomasia.
Immuna metten a nangidatag ti diplomatic protest ti Department of Foreign Affairs (DFA) kontra iti China mainaig ti AI-generated video ti China Daily, nga inladawan da a “demeaning, dehumanizing, ken racist.”
Inpaganetget ti DFA nga iti saan a panagtunos iti legal a saritaan ken pulitikal ket saan a mangited ti rason iti panagusar ti makainsulto ken mangisagmak a panangiladawan kontra kadagiti Pilipino.###
