LA UNION – Nangiruar ti pammilin ti archdiocese idiay Estado Unidos para kadagiti simbaaan nga iraman iti kararag kada adda ti maangay a misa dagiti lugar nga apektado ti agkakapigsa a bagyo iti nasao a pagilyan.
Iti pannakiuman ti Bombo Radyo kenni Fr. Erasmus Ferdinand Soriano ti St. Paul’s Church a nakabase idiay syudad ti Los Angeles idiay Amerika, kinunana nga uray saanda nga apektado iti napalabas a Hurricane Harvey, ken ti supertypoon Irma a madama a dumaldalapus idiay Florida ket iramramanda iti kararagda dagiti apektado a residente.
Malaksid iti panangisagot iti karakarag kada adda ti misa kadagiti simbahan ket isagsaganada dagiti tulong wenno relief goods a maibunong kadagiti surviors.
Umap-apela met ni Fr. Soriano kadagiti kakailyan nga adda ditoy Pilipinas nga iramanda met iti panagkararag tapno agbalin a natalged dagiti minilyon nga agnanaed idiay Amerika a makapaspasar ti kalamidad. (AbsFlores)
