LA UNION – Nangisayangkat iti maysa a peaceful rally dagiti supporters ni Frank Ong Sibuma a nangabak a mayor idiay ili ti Agoo, La Union idi May 9 national and local elections.
Nagu-ummong dagiti taga-suporta ni Mayor Sibuma iti sangwanan a mismo ti COMELEC-Agoo nga adda iti likudan ti munisipiyo.
Nainget a binantayan dagiti kameng ti Agoo PNP iti nasao nga aktibidad tapno masiguro ti seguridad iti munisipiyo ti Agoo.
Daytoy ket panangpakita ti suporta kenni Sibuma kalpasan nga immandar ti Commission on Elections (Comelec) 2nd Division iti Municipal Board of Canvassers (MBoC) idiay Agoo a was-wasen iti Certificate of Candidacy ken proklamasyon ni Sibuma kas kandidato ken nangabak a mayor iti nasao nga ili.
Immunan a kinumpirma iti Bombo Radyo La Union ni Atty. Joel Gines, Provincial Election Supervisor ditoy La Union, a nagturong da idiay Comelec Central Office idiay Intramuros, Manila tapno tungpalen iti bilin kadakuada ti komisyon nga ag-reconvene ita nga aldaw, Hulyo 5.
Segun pay kenni Gines, kadwa na ti MBoC a nagturong idiay Manila tapno ipatungpal ti nasao a pammilin.
Naamwan nga idi Mayo a-13, nag-file ti petition idiay COMELEC iti maysa nga Alma Panelo, a nangibaga a saan a residente ti Agoo ni Sibuma, maisupadi iti inlanad na iti Certificate of Candidacy (COC) daytoy, nga agnanaed iti balay na idiay Barangay Sta. Barbara, Agoo iti 15 a bulan sakbay iti May 9.
Ngem ipak-pakita iti dua a certifications nga indatag ti petitioner kas ebidensiya, a saan a kukua ni Sibuma iti ibagbaga na a balay na iti nasao a barangay, nudiket residente daytoy iti kabangibang na nga ili ti Aringay.
Iti met biang ni Sibuma, nagsumite dagiti abogado na iti dokumento a mangpaneknek a naipasngay ken nagadal idiay Agoo, maipagarop a nagbayadan na iti bills manipud iti nasao a balay na, ngem saan nga immanay dagitoy a kas pruweba.
Maipagarop a saan metten a nag-file ti motion for reconsideration iti kampo ni Sibuma.
Gaputi dayta, nangiruar iti ruling a final and executory iti Comelec Second Division kontra kenni Sibuma, iti five-page writ of execution a pirmado ni Commissioner Socorro Inting, ken binilin na iti MBoC a ni Stef Eriguel iti ideklara a nangabak a mayor idiay Agoo.
Kabayatanna, mapapati a pinagsapata dagiti opisyal ti COMELEC idiay Intramuros Manila ni Incumbent Mayor Stefanie Eriguel, ngem maur-uray pay laeng ti panang-kumpirma daytoy a damag iti COMELEC Provincial Office.
Maipalagip a nangabak ni Sibuma iti Mayoral race idiay Agoo babaen ti 21,364 votes kontra iti 16,603 votes ni Eriguel.
