Naitantan ti nasurok maysa nga oras dagiti tren idiay Italy idi Sabado (aldaw idiay Italy) gapu ti mapapati a panangsabotahe, kalpasan a mauram dagiti kable ti tren kagidaan ti panangisayangkat ti Winter Olympics idiay Milan ken Cortina d’Ampezzo manipud idi Pebrero 6.
Apektado dagiti serbisio iti nagbaetan ti Naples ken Rome, kasta met iti linya nga agturong iti amianan ti Florence.
Kinondenar met ni Transport Minister Matteo Salvini iti insidente ken nagpanawagan ti panagsungbat para kadagiti responsable kas iti kapada a problema a napadasan ti ahensia idi napalabas a Dominggo.
Iti agdama ket im-imbestigaran dagiti otoridad iti nauram a kable iti maysa a seksion ti high-speed line iti nagbaetan ti Rome ken Naples, kasta met dagiti dua a posible a kaso ti vandalism idiay kabisera ken ti Florence.
Idi napalabas a Sabado, iti umuna nga aldaw ti Winter Olympics, inako ti maysa nga anarchist group iti responsibilidad ti panagraut iti network asideg ti Bologna, a nakadadaelan ti imprastraktura ti riles a nangigubuay ti nasurok dua nga oras a pannakaitantan iti high-speed, Intercity, ken regional train services.
Agtultuloy met iti panagammiris tapno maammuan dagiti suspek tapno maliklikan iti kanayunan a panakaitantan iti transportasyon bayat nga agtultuloy dagiti paay-ayam.###
