Imbatad ti Department of Justice a posible a maipatulod iti sabali a pagilian dagiti narekobre a tulang idiay Taal lake tapno maipasidong ti siyentipiko a panagadal.
Inbinglay ni Justice Secretary Jesus Crispin ‘Boying’ Remulla ti nasao a plano mainaig iti panangisayangkat ti DNA testing ken innayon a kasapulan iti kabaroan a wagas nga inaklon na nga agkurkurang iti Pilipinas.
Partikular a dinakamat na iti pagilian a Japan a nagkiddawan iti ahensya para iti kanayunan a tulong para ti DNA testing wenno forensic examination kadagiti nasao a tulang.
Kabayatanna, ibilbilang met a “premature” ti waragawag ti Philippine National Police (PNP) mainaig iti DNA testing ken innayon a nu inpubliko iti kapulisan nga awan iti nagun-od da a DNA profile ket saan dan nga agsasao pay mainaig iti kaso.
Laksid daitoy ket impadanon na met iti panagyaman na iti Philippine Coast Guard iti koordinasyon da ken agtultuloy a panangisayangkat ti search and retrieval operation idiay Taal lake.
Binigbig ti Department of Justice iti parte ti PCG para iti panagrang-ay ti imbestigasyon wenno case build up dagiti missing sabungeros.
