Opisyalen a simmango kas umuna a testigo ti depensa ni Davao City Assessor Engr. Jaime G. Adalin iti panagtultuloy ti impeachment trial ni Vice President Sara Duterte ita nga aldaw ti Lunes, Nobyembre 9, 2026.
Impresenta ni defense counsel Atty. Lindon Miguel Bacquel ni Adalin tapnu paneknekan nga iti sanikua a sakop ti maysa a Transfer Certificate of Title (TCT) ket naurnos a naideklara ti Bise Presidente iti Statement of Assets, Liabilities, and Net Worth (SALN) na.
Nupay kasta, dagus a kinuwestiyon ni prosecution counsel Atty. Benjamin Tolosa Jr. iti tarigagay ti depensa ken kinuna a saan a kabaelan a paneknekan ti testigo nga iti sanikua a nakailanad iti SALN ket kapada ayan ti TCT gapu iti makitkita a “glaring discrepancy” partikular iti acquisition value daitoy, malaksid iti panagkedked kadagiti sumagmamano nga offer of testimony a kinuna na ket “improper” ken “misleading.”
Iti tengnga ti panagusig, kimmiddaw ni Atty. Bacquel iti temporario a suspensyon ti trial tapnu masukimat dagiti kanayunan a dokumento nga imet ti testigo.
“With due respect, your honor, if we can also be given a few minutes to examine and peruse the documents?” apela ni Bacquel kenni Presiding Officer Francis “Chiz” Escudero kalpasan nga amwen daitoy nu adda iti kopya iti depensa, ken sinungbatan met ti abogado nga “We have copies of the tax declaration, your honor, but to ensure and to examine the other documents that have been brought by the witness, which we may not have any copy, your honor,” a dagus met a pinalubusan ti hukom babaen ti tallo a minuto a recess.
Sakbay iti apagbiit nga interruption, kinumpirma met ni Adalin babaen iti imet nga Administrative District Index Map nga iti Barangay Matina Crossing ken Barangay 74-A ket maymaysa laeng a lugar iti Ciudad ti Davao kalpasan nga ideklara ni Escudero a palpalubusan na met iti prosekusyon nga ag-stipulate mainaig iti nasao nga isyu.
