Impasigurado ti Department of Budget and Management (DBM) iti publiko nga adda pay laeng umdas a pondo para iti disaster response ken recovery efforts kadagiti lugar a naapektaran kadagiti didigra.
Segun kenni Budget Secretary Amenah Pangaman, nakasaganan ti gobierno a mangsungbat kadagiti kasapulan dagiti indibidual a naidestiero gapu iti nasaknap a layus nga inggubuay ti tuloy-tuloy a napigsa a panagtudo gapu kadagiti bagyo ken ti habagat.
Segun iti sekretario, adda national disaster risk reduction and management fund wenno dagiti nakatukon a pondo kadagiti lugar a naapektaran malaksid pay kadagiti stand-by a pondo ti tunggal front-line agencies a mabalin nga usaren para ti panangipaay kadagiti relief aids ken recovery efforts.
Nagapelar ti DBM kadagiti ahensia a makiuman kadakuada tapno maipaayan da ti kasapulan, agraman ti replenishment dagiti quick response funds-da.
Impalagip da kadagiti amin a maseknan nga ahensia ti gobierno a siguraduen ti umno ken epektibo a pannakausar ti pondo agingga kaudian a sentimo tapno masigurado ti tulong dagiti maitutop a benepisiario iti kabiitan a panawen.
