Nagpanawagan ni Mamamayang Liberal Party-list Rep. Leila de Lima ken Akbayan Party-list Rep. Chel Diokno ti naing-inget a transparency ken accountability iti pannakausar ti pondo ti publiko kalpasan ti desision ti Korte Suprema (SC) a nangikeddeng iti limitasion kadagiti unprogrammed appropriations.
Kas maysa a co-petitioner iti maysa kadagiti kaso a pinagtitipon ti Supreme Court, kinuna ni De Lima a nupay kayatda a naan-anay a mawaswas ti bisa ti unprogrammed appropriations (UA), napateg nga addang para iti Korte a mangikeddeng iti nalawag a limitasion ti konstitusion tapno malapdan ti pannakaabuso iti pondo.
Impaganetgetna pay a saan a rumbeng nga agbalin a proteksiyon kontra iti pagsungsungbatan, ti doctrine of operatives fact para kadagidiay mapaneknekan a nagtignay nga addaan iti dakes a panggep.
Kabayatanna, impaganetget met ni Diokno a nalawag koma a mailasin ken mapondoan dagiti prioridad a proyekto imbes nga ikabil dagitoy iti Unprogrammed Appropriations, a mabalin nga agresulta ti nalaka a pannaka-abuso ken kurapsion.
Nagpanawagan pay daytoy iti Senado ken House of Representatives a siguraduenda a ti 2027 national budget ket maitunos iti desision ti Supreme Court, manipud kadagiti nabatbati a deliberasion agingga iti bicameral conference committee.
Agpada a kinuna dagiti dua a mammanday-linteg a kasapulan a maikkat dagiti porma ti pork barrel ken masigurado a mausar ti nasional a badyet para iti pagimbagan dagiti umili a Pilipino.
