Mamati ni sigud nga Albay Representative Joey Salceda a maysa a “misguided gamble” wenno biddut a panagsugal iti nasapa a waragawag ni Bise Presidente Sara Duterte ti panagtaray na iti kinapresidente inton 2028.
Segun kenni Salceda, saan pay a panawen ken saan pay a kasapulan ti nasao a waragawag gapu ta agtalinaed iti puesto ni Presidente Marcos Jr. aginggana Hunyo 2028.
Ni Salceda ket naminsanen a nagkampanya ken intandudo ti nasional nga ambision ni Duterte idi 2022.
Kenuna ti mammanday-linteg iti maysa a media forum idiay Quezon City a nupay nakatrabaho na idi ni Duterte ket ibilangna nga “ill-advised move” iti nasapa a panangideklara ti kandidatura.
Napigpigsa ti maysa a presidential bid no daytoy ket nagtaud ti boluntario a panawagan ti publiko ken saan nga iti nasapa a panagposision.
Impunto na met nga idi 2022 ket maysa isuna kadagiti nangallukoy kenni Duterte a tumaray iti kinapresidente.###
