Ninaganan ti International Criminal Court (ICC) da Senador Ronald “Bato” dela Rosa ken Senador Christopher Lawrence “Bong” Go a kas co-perpetrators iti kaso nga adda pakainaiganna iti kampania kontra droga ni sigud a Presidente Rodrigo Duterte.
Maibasar iti nairuar a Document Containing the Charges (DCC) idi Pebrero 13, 2026, nabigbig ni Duterte a kas indirect co-perpetrator babaen ti Article 25 (3)(a) ti Rome Statute gapu crimes against humanity, particular a murder ken attempted murder.
Nakalanad iti dokumento a dagiti pammatay ket napasamak manipud idi 2011 aginggana 2019, karaman dagiti insidente idiay Davao City a nainaig iti Davao Death Squad, ken dagiti operasion iti sidong ti “war on drugs” iti panawen ti administrasionna.
Segun ti ICC, iti pannakairaman da dela Rosa ken Go iti listaan ket gapu iti akemda a panangipatungpal ken panangsuporta kadagiti polisiya ti drug war.
Karaman pay kadagiti nainaganan nga opisial dagiti sumagmamano a sigud a miembro ti gabinete ken dagiti pannakabagi ti linteg nga addaan ti direkta nga akem iti operasion.
Dagitoy dagiti innagan ti ICC:
- Ronald “Bato” Dela Rosa
- Vicente Danao
- Camilo Cascolan
- Oscar Albayalde
- Christopher Lawrence “Bong” Go
- Dante Gierran
- Isidto Lapeña
- Vitaliano Aguirre II
- Dadduma pay nga opisial ti Philippine National Police ken high-ranking government officials
Iti agdama, nakatuding nga adalen ti Pre-Trial Chamber dagiti ebidensia tapno maammuan no maiduron ti panagusing.
Inpaganetget ti ICC nga iti pannakairuar ti dokumento ket paset ti transparency ken tapno maipakita iti sakup ti responsibilidad iti nabirngasan a “war on drugs” ti Pilipinas.
Ur-urayen pay laeng ti Bombo Radyo iti sungbat dagiti nainaganan nga indibidual mainaig iti daytoy a banag.###
