LA UNION – Agtultuloy iti imbestigasyon ti Bureau of Fire Protection (BFP)-San Juan tapno amwen iti pakabuklan a danyos ken makagapo iti kellaat a panagliyab ken pannakauram iti maysa a delivery truckitay agsapa iti kawatiwatan ti diversion road partikular iti sakop ti Barangay Panicsican, San Juan, La Union.
Iti eksklusibo nga interview ti Bombo Radyo La Union kenni Fire Senior Inspector Juvinal Formacion, fire marshal officer ti BFP-San Juan, kinuna na a dagus da a nagresponde iti tawag a mangibagbaga nga adda maur-uram a lugan.
Ngem idi sumangpet dagiti bombero iti nasao a lugar ket dackelen ti apoy ken dandanin dumapo iti intero a lugan.
Istorya met iti Bombo Radyo ti truck driver a ni Jonathan Gerardino, 43, tubo ti Bicol, a nagsardeng ken bimmaba da iti kadwa na iti igid ti kalsada gaputi maipagarop a panagpalya ti preno ti lugan.
Naklaat da idi makita da a maur-uram metten iti pilid agingga a napartak a nagramaran ti apoy iti intero a lugan.
Iti nasao a delivery truck (plate#WIG 401) a nagkarga iti alcohol ken grocery items ket agturong koma idiay probinsiya ti Ilocos Sur.
