LA UNION – Nangipeksa ti panagladingit dagiti sumagmamano a lechon vendor gapu iti kimmapsot a panaglako-da, iti laksid ti nangato a demand ita nga Holiday season.
Segun kadagiti aglaklako, maysa kadagiti kangrunaan a rason ket iti nakaro a kompetision iti nagbaetan dagiti nadumaduma a lechonan a timmaud, kasta met iti agtultuloy a panagngato ti gastos dagiti consumers.
Gapu iti daytoy, inaklon dagiti dadduma a saan da a marikna iti ragsak ita a Paskua gapu ti nababa a napastrekan.
Iti pannakiuman ti Bombo Radyo iti maysa kadagiti establishimento dituy siyudad ti San Fernando nga Elyu Naks Lechon Manok & Liempo, pinagtalinaedda iti presio dagiti lako da a lechon iti laksid ti nangato a demand tapno makabael latta para kadagiti customers.
•₱320 – lechon manok
•₱380 – liempo
Malaksid iti karit ti kompetision, saan met a nalaka iti aktual a proseso ti panagluto ken ti pannakaisarang iti pudot ti paglutuan.
Tunggal lechon ket maluto manipud 45 a minuto agingga maysa nga oras, isu a kasapulan ti anus ken panagbantay tapno masigurado iti kalidad ti produkto.
Agtaltalinaed met a positibo dagiti owners ken mangnamnamada nga ad-ado pay dagiti mangtagiragsak ken mangsuporta kadagiti babassit a negosio kas kadakuada.#
