LA UNION – Pimmigsa iti laban ken namnama ni Democrat Presidential Candidate Kamala Harris kontra iti kalaban a ni Republican Presidential Candidate Donald Trump.
Daytoy ket kalpasan iti panangiyindurso kenkuana ni incumbent President Joe Biden ken dadduma pay a sigud a nag-presidente ti Amerika, kas kada Barack Obama ken Bill Clinton agraman dagiti sigud a first ladies Michelle Obama ken Hillary Clinton, ken dadduma pay a nalatak a personalidad iti uppat nga aldaw a convention, nangrugi idi Lunes, Aug. 19 ken nagpatingga idi Huwebes, Agosto 22.
Daytoy iti imbatad ni Bombo International News Correspondent Allan Rogelio Sobrevilla kabayatan ti pannakiuman ti Bombo Radyo La Union kenkuana, maibasar iti kapaliiwanna nangruna kadagiti mabuy-buya na iti naduma-duma a TV station idiay Amerika.
Kinuna na, nu iti sigud ket arigna aniniwan laeng ni Biden ni Harris, sabali itan agsipudta nagun-od na ti suporta iti Democrats ken pormal metten nga inawat na ti nominasyon nga isuna ti mangibagi ken mangitandudo ti Democratic Party iti maisayangkat nga eleksiyon inton Nobyembre.
Nu mapagasatan, ni Harris ti umuna a babai nga ag-presidete ti Estados Unidos.
