Agtultuloy nga umad-adu ti bilang dagiti kaso ti dengue ditoy probinsia ti La Union, maibasar iti kaudian a Dengue Weekly Surveillance Update ti Provincial Epidemiology and Surveillance Unit (PESU) ti Provincial Government ti La Union para iti Morbidity Week 26, a mangsaklaw iti Enero 4 agingga iti Hulio 4, 2026.
Maibasar iti report, 93 a baro a kaso ti dengue iti nairekord ditoy probinsia manipud Hunio 28 agingga ti Hulio 4, 2026, isu nga umabot iti 1,005 ti pakabuklan ti kaso a nairehistro dagiti nadumaduma a reporting unit iti La Union manipud Enero 4 agingga Hulio 4, 2026.
Nangatngato daytoy ti 24.23% maiyarig ti 809 a kaso a nairekord kabayatan ti kapada a period idi tawen 2025, a mangipasimudaag iti agtultuloy a panagngato ti insidente ti dengue ditoy probinsia ita a tawen.
Maibasar ti surveillance report, iti kaudian a petsa ti panangrugi ti sakit a nairekord ket Hulio 3, 2026, idinto a ti data cut-off ket agingga iti Hulio 4, 2026.
Iti listaan dagiti ili ken siudad nga addaan iti kaaduan a nairekord a kaso ti dengue ita a tawen, immuna iti ili ti Bagulin nga addaan ti 251 a kaso, rason a mangideklara iti dengue outbreak ditoy. Sinaruno ti City of San Fernando nga addaan ti 160 a kaso, Bacnotan nga addaan ti 83 a kaso, Rosario nga addaan ti 58 a kaso, ken Aringay nga addaan ti 54 a kaso.
Gapu iti kinaadu dagiti nairekord a kaso idiay Bagulin, dagus a nangisayangkat ti epidemiological investigation ti Provincial Health Office (PHO) babaen ti pannakitinnulong ti Department of Health (DOH) ken ti Municipal Health Office (MHO) ti Bagulin. Panggep ti imbestigasion a maammuan no sadino ti nagtaudan ti panagwaras ti sakit, matingiting ti kasasaad iti komunidad, ken dagus a maipatungpal dagiti maitutop a wagas tapno malapdan ti ad-adu pay a panagadu ti kaso.
Impakita met ti report ti surveillance a dagidiay nakaptan ti dengue ket agtawen ti nababbaba ngem maysa a tawen agingga iti 87 a tawen, nga addaan ti median nga edad a 15 a tawen. Ti kangatuan a bilang dagiti kaso ket nairekord kadagiti ubbing nga agtawen ti 10 agingga iti 14 a tawen, a dimmanon iti 207 a kaso wenno 20.6 a porsiento iti pakabuklan, a mangipasimudaag nga agtaltalinaed nga agtutubo ti kaaduan a naapektaran a sektor ti populasion.
No maipapan iti sekso, dandani agpapada ti bilang dagiti kaso ti dengue. 506 a kaso wenno 50.35 a porsiento ti nairekord kadagiti lallaki, idinto a 499 a kaso wenno 49.65 a porsiento ti nairekord kadagiti babbai.
Kabayatanna, nairekord ti probinsia ti uppat (4) a natay gapu iti dengue manipud Morbidity Week 1 agingga iti Morbidity Week 26, nga addaan iti Case Fatality Rate (CFR) a 0.4 porsiento. Iti nadakamat a bilang, tallo (3) kadagiti pimmusay ket taga-Bagulin, idinto a maysa (1) ket taga-Ciudad ti San Fernando.
Iti dagup a 1,005 a kaso, 511 wenno 50.85 a porsiento ti nakumpirmaan a kaso, 27 wenno 2.69 a porsiento ti probable cases, ken 467 wenno 46.47 a porsiento ti suspected cases, maibasar iti klasipikasion ti surveillance report.
Kabayatanna, agtultuloy ti panawagan ti Provincial Health Office iti publiko a paingiten dagiti addang kontra dengue, pakairamanan ti regular a panagdalus iti aglawlaw, panangikkat kadagiti lugar a mabalin a pagpaaduan dagiti lamok, panangtungpal iti 4S Strategy ti Department of Health, ken dagus a panagkonsulta iti kaasitgan a pasilidad ti salun-at no adda mapasaran dagiti sintomas ti dengue tapno malapdan ti panagkaro ti sakit ken maksayan ti risgo ti ipapatay. (Report by Bombo Ericka Quinzon)
