Nangisayangkat ti Department of Environment and Natural Resources (DENR) babaen ti Provincial Environment and Natural Resources Office (PENRO) La Union iti programa a “DENR Express: Permitting on Wheels” idi Abril 21,2026.
Naangay ti nasao nga inisiatiba idiay 2nd floor ti SM City La Union.
Silulukat ti mobile service booth manipud alas-11 ti bigat agingga iti alas-singko ti malem tapno umawat iti nadumaduma nga aplikasion ken mangipaay iti konsultasion kadagiti umili.
Daytoy a programa ket mangted ti “Services made faster, easier, and closer to you by DENR!”, nga addaan panggep a tulongan dagiti kliyente, nangruna dagiti mannalon, negosiante, ken residente a marigatan a mapan kadagiti adayo nga opisina ti DENR. Babaen ti panangikabil iti booth iti uneg ti mall, manamnama a komportable ken naparpartak ti pannakaproseso dagiti mainaig a dokumento ken permit.
Inpakaammo ti PENRO La Union a dandani amin a kangrunaan a serbisio ti departamento ket maited iti nadakamat a lokasion.
Paregtaen ti liderato ti DENR Ilocos Region dagiti umili iti La Union ken kabangibang a lugar a gundawayanda daytoy a programa. Mabalakadan dagiti aplikante nga iyegda ti kompleto a kasapulan tapno masigurado ti napartak a transaksion.
Adda met dagiti nadumaduma nga organisasyon a nakipaset ita nga aldaw kas iti Ilocos Sur environmental enthusiasts. (Report by Bombo Alphea)
