Kalkalikaguman itatta ti Department of Environment and Natural Resources Region 1, ti pannakaapruba iti 10-year solid waste management plan dagiti naduma duma a Local Government Units ditoy Ilocos Region.
Iti pannakiuman ti Bombo Radyo La Union kenni DENR Region 1 Senior Communication Development Officer Renelita Santos, kinunana nga adda itattan ti 59 nga LGU’s ditoy rehiyon ti aprubadon ti 10-year solid waste management plan dagitoy.
Ditoy Probinsya ti La Union, kinumpirma na nga amin nga Lgu’s agraman ti 1 a syudad ket aprubadon ti 10-year solid waste management plan dagitoy.
10 nga ili met ditoy probinsya ti addaan metten ti bukod na a sanitary landfill a naipatatder.
Maysa ti sanitary landfill kadagiti components iti solid waste management plan.
Mabalin kinunana a ti maysa nga ili nga awanan pay laeng ti sanitary landfill na ket makipagtaripnong da iti kabangibang da nga LGU ken agpinnirma dagitoy ti MOA tapno mapalubusan ti maysa nga LGU nga agidispose kadagiti basura da iti maysa nga ili.
Adda gamin kinunana dagiti LGU’s nga awan pay laeng ti nasapolan da a lote a mabalin da nga aramiden a sanitary landfill isut gapu na a maysa daytoy panagpinnirma iti MOA iti baetan ti adjacent LGU’s ti rekomendasyon ti DENR.
Gagem ti pannakaestablishar ti solid waste management plan ket tapno addaan ti naurnos a sistema dagiti LGU’s iti panagidispose kadagiti basura a no sadinno ket protektaranna ti salun-at dagiti constituents ken ti aglawlaw.
Segun pay iti DENR, tarigagay da a magun-od ti 80-90% a target iti pannakaapruba ti 10-year solid waste management plan iti 125 nga Lgu’s ditoy Ilocos Region.
Positibo met ti DENR Region 1 a magun-od da ti nadakamat a porsyento gapu ta mannarimaan itattan ti isaysayangkat a dialogue dagiti Lgu’s kadagiti stakeholders.
