LA UNION – Panggep ti Department of Agriculture ti mangbangon iti ad-adu pay a food hubs iti pagilian kas paset ti logistics roadmap ti gobierno.
Segun kenni Agriculture Secretary Francisco Tiu Laurel, Jr., dagitoy a food hubs ket agserbi a wagas para kadagiti mannalon ken kooperatiba a direkta a mangibiahe ken mangilako kadagiti produktoda.
Nalaklaka met ditoy ti transaksion kadagiti consumer, nangruna kadagiti wholesaler a gumatang.
Kinunana a panggep met ti nalawlawa a roadmap para iti logistics a mapasayaat ti supply chain ti agrikultura, ken masigurado ti umdas a suplay dagiti produkto ti agrikultura ken abot kaya a presio.
Iti agdama, maysa kadagiti target a manglukat iti umuna a food hub ket iti BFCT Bagsakan Center idiay Marikina a pakaangayan met ti cold storage ken dry warehouses.
