Pormal a nalukatan ita nga aldaw, Mayo 22, 2026, ti DOH Wellness Center iti Robinsons Place La Union, kas maysa a dakkel a tukad tapno maiyasideg ti serbisio ti salun-at kadagiti publiko ken mapapigsa ti pannakaipaay dagiti preventive health services iti komunidad.
Ti proyekto ket pannakikadua ti Department of Health – Ilocos Center for Health Development, Robinsons Land Corporation ken Ilocos Training and Regional Medical Center wenno ITRMC, ti wellness center ket masarakan iti maikatlo a tukad ti mall.
Iti nasao a pasilidad, maipaay dagiti libre ken nalaka a maakses a primary healthcare ken preventive services manipud alas-dies ti bigat agingga alas-sais ti rabii kada aldaw.
Panggep daytoy a maidanon ti serbisio ti salun-at kadagiti mall goers, trabahador, pamilya ken amin a publiko iti nasayaat ken komportable a lugar.
Nagserbi a guest of honor ni Glenn Matthew Baggao, DOH Undersecretary, nga nangipaganetget a ti pannakailukat ti wellness center ket mangipakita iti panangipatuloy ti gobyerno a mangidanon iti healthcare services iti tunggal komunidad ken mangpasayaat iti healthcare experience dagiti Pilipino. (Report by Bombo Lorie)
