Al-allukuyen ti Department of Information and Communications Technology (DICT) iti publiko nga i-download ken agusar ti eGOVph application tapno mapalaka ti panaka-access kadagiti naduma-duma a serbisio ti gobierno ken mapapardas dagiti transaksion.
Segun kenni Dr. Jaemie D. Ruiz-Chua, Officer-In-Charge Regional Director ti DICT, iti maysa laeng a click ket ma-access-en dagiti umili dagiti adu a serbisio manipud kadagiti ahensia ti gobierno babaen ti eGOVph app.
Karaman kadagiti serbisio a mabalin nga usaren iti app ket dagiti serbisio ti Bureau of Internal Revenue (BIR), Land Transportation Office (LTO), National Bureau of Investigation (NBI), ken naduma-duma pay. Babaen daytoy, mabalin nga ag-renew dagiti dokumento ken mangala iti sabali pay a serbisio online. Kas pangarigan, mabalin nga ma-access iti digital a kopia ti lisensia ti LTO no malipatan ti maysa a motorista iti pisikal a lisensiana.
Para met kadagiti negosiante, mabalin met a mausar iti eGOVph iti business processing ken licensing. Imbes a pumila kadagiti opisina, mabalin a maaramid online dagiti dadduma a proseso ken aplikasion babaen laeng ti sumagmamano a click.
Adda met iti aplikasion iti eGOVPay, a mangipalubos kadagiti agar-aramat a mangbayad kadagiti government fees ken sabali pay a babayadan iti nalaka ken napardas a wagas.
Kabayatanna, para kadagiti sumrek ken rumuar iti pagilian, naka-integrate met iti app iti eTravel. Para met kadagiti agsapsapul iti trabaho, adda iti eTrabaho, a pakasarakaan a mabalin nga i-upload dagiti resume ken curriculum vitae (CV) tapno makatulong iti panagbirok ti trabaho.
Gapu daytoy, allukoy ti DICT iti publiko nga ag-download ken agusar ti eGOVph app tapno magun-od ti napardas, nalaka, ken episiente a panag-access ken panag-transaksiyon kadagiti naduma-duma nga ahensia ti gobierno. Kas kuna pay ni Dr. Ruiz-Chua, “Iti maysa a click, addaanen amin iti eGOVph.” (Report by Bombo Jordan)
