Nainget nga impaganetget ti Department of National Defense (DND) a saan a mabuteng iti Pilipinas iti tengnga ti tension iti Bajo de Masinloc sadiay West Philippine Sea.
Daytoy ket kalpasan iti insidente idi Agosto 11, 2025, no sadino kinamat ti Chinese maritime forces iti Philippine Coast Guard vessel a BRP Suluan bayat a mangipatpatungpal ti humanitarian mission para kadagiti mangngalap a Pilipino. Iti insidente, nagdinnungpar iti maysa a China Coast Guard vessel ken maysa a barko ti Chinese People’s Liberation Army Navy.
Iti waragawag ti DND, kenuna daytoy a makipampamaysa da iti Philippine Coast Guard ken impaganetget iti takder ti pagilian kontra iti aniaman a panaggandat a mangbutbuteng iti Pilipinas.
Kenuna met ni Defense Secretary Gilberto Teodoro Jr. a saan nga agtartarigagat ti gubat wenno komprontasion iti Pilipinas, ngem kasapulan nga aramiden ti pagilian iti rumbeng tapno masalakniban iti soberanya ken sovereign rights daytoy.
Ibilang ti gobierno iti Bajo de Masinloc kas napateg a paset ti teritorio ti pagilian. Kadagiti opisial a dokumento ti pagilian, impaganetget nga iti posision ti Pilipinas ket nakabasar iti United Nations Convention on the Law of the Sea (UNCLOS) ken ti 2016 Arbitral Award.
Kabayatanna, agtultuloy met nga us-usaren ti Pilipinas dagiti opisial a nautical chart ken dokumentasion tapno ipakita iti international community iti maritime entitlements daytoy. Segun ti United Nations records, karamanen kadagiti immuna nga indeposito ti Pilipinas iti geographic coordinates a mangiramraman iti Bajo de Masinloc.
Impaganetget ti Pilipinas a dagitoy nga addang ket paset ti panangilaban iti soberanya, sovereign rights ken hurisdiksion ti pagilian maitunos iti international law.###
