LA UNION – Aminado ni DepEd Sec. Leonor Briones a nupay agtultuloy dagiti karit a gapwanan ti Covid-19, tuloy met iti ar-aramiden a panagresponde ti ahensiya tapno labanan iti nakaru nga epekto ti pandemya ket saan a maikompromiso iti sistema ti edukasyon ditoy pagilian.
Nupay tarigagay ti departamento a mangisayangkat ti face-to-face classes kadagiti mapili a lugar ditoy pagilian, kasapolan latta iti naan-anay a panagannad ken saan da nga agdarasudos nga ipatungpal daytoy nangruna ket awan pay iti simmangpet a bakuna kontra iti makapatay a sakit.
Iti naangay nga Edukasyon Press Conference nga indaulwan ti DepEd Region 1 idi kalman babaen iti zoom, a dinar-ayan mismo ni Briones agraman iti sumagmamano a kameng to media ditoy rehiyon uno a pakairamanan ti Bombo Radyo La Union, kinuna iti sekretaryo nga agtultuloy iti panagsagana ti opisina na para iti maisayangkat a limited face-to-face classes iti masungad nga aldaw.
Mainaig ti daytoy ket nangituding ti DepEd iti uppat a kondisyon para kadagiti lugar a low risk iti Covid 19 ken mairekomenda a maaddaan ti limited face-to-face classes.
Kabilang dagiti nasao a kondisyon ket: maisayangkat nga umuna ti pilot testing iti face-to-face classes kadagiti low risk areas, kasapolan nga adda pammalubos dagiti LGUs para iti limited face-to-face classes, kasapolan ti written consent manipud nagannak a palubosan da dagiti annak da nga umatendar ti face to face classes, ken nasken a nakasagana dagiti pasilidad kadagiti pagadalan a sumurot iti health protocols nga ipatpatungpal ti Dept. of Health.
Innayon pay ti sekretaryo a nupay nakasagana a kanayun ti DepEd para iti nasao a tarigagay, ni latta President Rodrigo Duterte iti addaan ti ‘final say’ wenno agdesisyon nu mabalinen nga ipatungpal ti face-to-face classes.
