Bayat ti panagsangbay iti moving up ceremony ken graduation ceremony iti nadumaduma a pagadalan iti sidong ti Department of Education (DepEd), impalagip manen ti ahensia iti maipapan iti nagdumaan dagitoy.
Segun ti DepEd, saanen a maawagan a “graduation ceremony” ti panagturpos dagiti estudiante iti kindergarten, Grade 6, ken Junior High School. Iti agdama, maawaganen daytoy a “moving up ceremony” gapu ta dagiti estudyante ket agtuloy wenno umuli iti nangatngato a lebel ti edukasion.
Kabayatanna, iti “graduation ceremony” ket naitukon laeng kadagiti estudyante nga agleppas iti Senior High School, a maibilang kas opisial a panagturpos iti K to 12 basic education program.
Inlawlawagda nga iti moving up ceremony, masapul nga isuot dagiti estudiante ti school uniform ken saan a toga kas paset iti panagsalimetmet iti kasayaatan ken panagbalin a simple ti programa.
Nagpalagip pay ti ahensia kadagiti pagadalan ken dagiti nagannak a suroten dagiti pagalagadan tapno agbalin a naurnos iti panangidaulo kadagitoy a seremonia. (Report by Bombo Jordan)
