Nakasaganan ti Department of Education Region 1 iti panaglukat ti klase dagiti estudyante inton Agosto 24. Daytoy ket kasaruno ti nagbalin a waragawag ni DepEd Secretary Leonor Briones idi Martes.
Iti pannakiuman iti Bombo Radyo La Union kenni DepEd Region 1 public affairs unit head Cesar Bucsit, kinuna na a malaksid iti virtual set-up wenno online class ket kitkitaen da pay ti posibilidad iti physical class no sadinno maaddaan iti face to face interaction dagiti estudyante iti mannursuro ngem ti sistema ket mabingay iti kada batch no sadino limitado dagiti estudyante nga umatendar iti klase iti maysa nga aldaw,depende no mano da ken no kasatno kalawa ti silid tapno maobserbaran ti physical distancing.
Para met kadagiti awanan iti access na iti internet, inpasigurado ni Bucsit a maaddaan to met iti hardcopy printed materials dagiti ubbing.
Inlawlawag ni Bucsit a ti enrolment dagiti estudyante ket alaenda ti listahan iti naiganwat nga early registration.
Innayon pay ni Bucsit a ti panaglukat iti klase inton Agosto 24 ket napagdesisyunan ken napagsasaritaan iti intero a Pilipinas manipud kadagiti concerned citizens ken saan laeng nga iti DepEd.
Iti agdama, pagadadalan pay iti deped no mairaman ti aldaw iti sabado nga agadal dagiti estudyante no sadinno maururay pay laeng ti resultana daytoy.
