LA UNION – Kinumpirma iti Department of Education (DepEd) Regional Office-1 a nakasaganadan para iti panaglukat wenno panangrugi ti blended learning kabayatan ti new normal iti intero nga Ilocos Region.
Kinuna ni DepEd Regional Office-1 Director Tolentino Aquino, agtultuloy iti panag-imprenta ken panangiwaras kadagiti modules para iti blended learning kadagiti naduma-duma a barangay.
Manarimaan met ti simulation exercises ken koordinasyon kadagiti nagannak tapno maipanamnama a naannayas ti panangrugi iti klase.
Sigun kenni Director Aquino, naartapan iti DepEd Regional Office-1 ti target a bilang dagiti enrollees iti Ilocos Region gapu ta immabot daytoy iti 101 percent.
Kabayatanna, kidkiddawen met ni Director Aquino kadagiti nagannak nga agpapaeskwela a kanayon koma iti pannakikoordinar dagitoy kadagiti eskwelaan kabayatan iti agdama a wagas ti panagadal gapu ti epekto iti COVID-19 pandemic.
