LA UNION – Addan a naituding iti deployment dagiti official ballots ken vote counting machines (VCMs) a mausar inton May 13 election.
Iti eksklusibo a pannakiuman ti Bombo Radyo La Union kada Election Officers Onofre Tilang Comelec-Bauang ken Gregorio Cabanban ti Comelec-Balaoan, agsapa ti May 13 a mai-distribute dagiti official ballots.
Nupay kasta, May 12 wenno nasap-sapa a maibunong dagiti balota para kadagiti nasulinek a barangay, partikular idiay ili ti Bacnotan, San Gabriel, Sudipen, Santol, Pugo, Bagulin, ken Burgos.
Kabayatanna, dua nga aldaw iti naituding a pannakai-deploy dagiti VCMs para iti 19 nga ili ken maysa a syudad.
Inton May 8, maibunong dagiti mausar a makina para iti 11 nga ili ken syudad, partikular idiay ili ti Aringay, Sudipen, Santol, San Gabriel, Bagulin, Burgos, Bacnotan, SFC, Sto Tomas, Tubao ken Pugo.
Bayat nga inton May 9, mai-deploy dagiti VCMs para idiay Naguilian, Agoo, Bangar, Luna, Caba, Bauang, Rosario, Balaoan ken San Juan.
Dagiti VCMs ket nairut a mabanbantayan babaen kadagiti otoridad iti provincial hub ti Comelec La Union idiay Barangay Bacsil, Bacnotan idinto a dagiti balota ket naka-secure iti tunggal municipal treasury office.
Mainaig ti daytoy, adda iti apela ni Onofre kadagiti supporters dagiti kandidato, tapno mabantayan a naimbag dagiti election materials and equipments.
Kabayatanna, manageable pay laeng ti sitwasyon idiay Balaoan, La Union kasaruno iti kauddian nga insidente ti panagtambang iti maysa a kandidato ken iti bunggoy daytoy, segun kenni Balaoan Comelec Officer Gregorio Cabanban.
Ita nga aldaw ti Lunes, Mayo 6 ket maipasidong iti Comelec control ti nasao nga ili.
