Nangisayangkat ti Development Bank of the Philippines (DBP) – San Fernando City Branch, babaen ti Branch Manager a ni Olivia Lora, ti courtesy call iti Municipal Government ti San Juan, La Union, kas paset ti agtultuloy a pannakilangen ti banko kadagiti lokal a gobierno.
Kabayatan ti panagbisita, personal nga inawat ni Mayor Mariquita Padua Ortega iti delegasion ti DBP no sadino a naisayangkat met iti pormal a turnover ti ₱150,000 a donasion para iti opisina ti Municipal Treasurer ti San Juan.
Immuna a naited ti nasao a tulong pinansyal kabayatan ti “Lab for All” activity ket pormal itan a naiyawat iti lokal a gobyerno.
Segun ti DBP, panggep ti donasion a tumulong a mangipatungpal kadagiti programa ken gannuat ti LGU a nakapamaysa iti panangpasayaat kadagiti social services, panangpapigsa ti community welfare programs, ken panangpainget kadagiti proyekto a direkta a pagnumaran dagiti umili.
Nagyaman ni Mayor Ortega iti DBP iti agtultuloy a suporta iti ili ti San Juan. Impaganetgetna iti kinapateg ti natibker a relasion iti nagbaetan dagiti nasional nga institusion, lokal a gobierno, ken ti pribado a sektor tapno maipaay ti naparpartak ken natalged a serbisio publiko.
Kabayatanna, inyebkas ti liderato ti DBP ti panagkumitda a makitinnulong kadagiti lokal a gobierno iti nadumaduma a paset ti pagilian, nangruna iti panangitandudo kadagiti proyekto ken programa a mangpadur-as iti komunidad.###
