LA UNION – Arestado iti maysa a diesel mechanic gaputi kaso a panaglabsing iti PD 705 wenno Revised Forestry Code of the Philippines ken R.A. 9175 wenno chainsaw act.
Nabigbig ti suspek iti nagan nga Inocencio Daguyen, adda iti umno nga edad, residente ti Barangay Bangar, Rosario, La Union.
Bayat a nakalibas ti kadwa daytoy a managan Javier Toil, maysa a mannalon, residente ti Barangay Saipan, Pugo, La Union.
Immuna ti daytoy, nakangngeg dagiti agpat-patrolya a pulis iti uni ti agpukpukan ti kayo babaen ti chainsaw idiay Barangay Saipan.
Gaputi dayta, dagus a nangisayangkat dagiti kameng ti Pugo Police Station kadwa da iti PENRO, iti anti-illegal logging operation.
Nagresulta daytoy iti pannaka-arestar iti suspek ngem nakalibas ti kadwa na.
Kinumpiskar pay dagiti otoridad iti 5 a flitches ti narra tree, a mapatta-patta nga agbalor iti P1,400 agraman ti inusar dagitoy a chainsaw nga agbalor ti P22,000.
Naamwan ti Bombo Radyo La Union kenni P/Captain Nestor Wanbe, agdama a hepe ti pulisiya idiay ili ti Pugo, nga usaren ti suspek iti pinukan da a kayo a pagdatar iti pagtaengan da, base met laengen ti salaysay daytoy.
Iti suspek agraman dagiti nakumpiskar a kayo ken chainsaw ket naipasidong iti custodiya ti PENRO-Pugo para iti umno a disposisyon.

RELATED ARTICLESMORE FROM AUTHOR