Pinaregta ti Department of the Interior and Local Government (DILG) dagiti amin a lokal a gobierno nga umakaren ti cashless transaction para ti panagkolekta ti buis, babayadan, ken dadduma pay a sisingiren ti gobierno. Daitoy ket maiyannurot ti memorandum circular nga impaulog ti DILG.
Segun iti DILG, ti digital payment ket mangpapigsa ti transparency ken efficiency ti sistema ken makatulong tapno mapalaka ti transaksyon iti publiko.
Nagballaag pay ti ahensya kadagiti LGUs nga ilinya dagiti systems da iti National Retail Payment System Framework ken ti Data Privacy Act tapno masiguro a natalged a masurot ti proseso.
Nabilin pay dagiti lokal a gobierno a mangituding ti nalawag a guidelines para ti electronic invoice a mailinya met ti Commission on Audit ken ti Bangko Sentral ng Pilipinas.
Nupay maitantandudo ti cashless payments, inlawlawag ti DILG a rumbeng nga umawat da latta iti cash ken dadduma pay a tradisyunal a wagas ti panagbayad.
Kasapulan pay dagitoy a mangipasa ti lokal nga ordinansa ken allagaden tapno suportaran a sibubukel ti cashless payment.
