Impasigurado ni Department of the Interior and Local Government (DILG) Secretary Jonvic Remulla nga awan ti special treatment a maawat ni Senador Jinggoy Estrada ken dadduma pay nga akusado iti maipagarup a ₱537 million flood control corruption scandal.
Segun kenni Remulla, dumalan ni Estrada iti kapada a proseso a maipakat kadagiti amin nga adda iti kustodia ti pulisya, pakairamanan ti booking procedures, fingerprinting, mugshots, ken medical examination.
Natiliw ni Estrada iti uneg ti Senado kalpasan nga inserbi dagiti otoridad ti arrest warrant nga inruar ti Sandiganbayan mainaig iti plunder case nga inpila ti Office of the Ombudsman.
Kalpasan a nabasa ti karbengan ken nailawlawag dagiti kaso kontra kenkuana iti imatang ti abogado daytoy, naiturong isuna iti Criminal Investigation and Detection Group (CIDG) headquarters idiay Camp Crame para iti due process.
Kabayatanna, imbutaktak ni Remulla nga adda ti apagbiit a panagsuppiat da kenni Senate President Alan Peter Cayetano kabayatan ti panagaresto. Kenunana a tinakderan ni Cayetano a saan a rumbeng a matiliw ti maysa a senador iti uneg ti Senado ken paruaren nga umuna iti pasdek sakbay a maipatungpal ti warrant.
Nupay kasta, imbaga ni Remulla nga awan ti agdama a linteg a mangiparit kadagiti otoridad nga agtiliw iti uneg ti Senado.
Kalpasan a nakompleto dagiti kasapulan a proseso iti Camp Crame, nayakar ni Estrada iti Sandiganbayan para iti kanayonan a legal procedure mainaig iti kaso.
Karaman pay iti arrest warrant ti sigud a Department of Public Works and Highways (DPWH) Secretary Manuel Bonoan ken dadduma pay a respondents iti nasao a kaso. Segun kenni Remulla, amin dagiti nairaman ket na-account dagiti otoridad.
Impaganetget ti DILG chief nga addan iti Sandiganbayan ti desision mainaig iti custody ken detention arrangements dagiti akusado.###
