Inlawlawag ni Department of the Interior and Local Government (DILG) Secretary Jonvic Remulla nga awan pay ti opisial a warrant of arrest manipud ti International Criminal Court (ICC) kontra kenni Senador Ronald “Bato” dela Rosa.
Segun kenni Remulla, agingga ita ket awan pay ti naawat a dokumento iti gobierno a mangpaneknek iti makunkuna nga arrest warrant.
Maisupadi daytoy iti umuna nga statement ni Ombudsman Jesus Crispin “Boying” Remulla nga addan ti nairuar a warrant kontra iti senador – rason ti saanna a panagserrek iti Senado, nupay agtultuloy iti panagpakitana iti social media babaen ti panangipost kadagiti sumagmamano a ladawan.
Innayon pay ti ahensia, namonitor pay iti senador kadagiti naduma-duma a lugar ditoy pagilian kadagiti napalabas a lawas.
Nagkedked a mangipaay ti waragawag iti abogadona a ni Atty. Israelito Torreon iti laksid ti tarigagay ti Bombo Radyo a maala iti dasigna.
Nadakamat ni sigud nga Special Envoy to China Mon Tulfo a maipagarup nga addan ti iggem ti ICC nga arrest warrant kontra kenni dela Rosa ken naammuanen iti lokasionna.
Agtaltalinaed nga awanan ti kumpirmasion manipud kadagiti ahensia ti gobierno seknan iti nasao nga isyu.#
