LA UNION – Kinumpirma ti Department of Interior and Local Government (DILG) La Union a kasapolan da pay iti kanayunan a 43 contact tracers a mai-deploy iti dadduma a lugar ditoy probinsiya.
Naamwan a nasurok 300 a contact tracers iti alaen ti nasao nga ahensiya para laeng ditoy La Union nga addaan ti tarigagay a mapapigsa ti contact tracing strategy iti tunggal lokal a gobyerno tapno madetermina a dagus dagiti indibiduwal a nasken nga ag-precaution kontra iti sakit a COVID 19.
Dagiti nasao a kanayunan nga 43 contact tracers ket mai-deploy iti dadduma pay a lugar ditoy probinsiya, mangrugi inton Disyembre 1 agingga Disyembre 31, 2020.
Immunan a dinakamat ni DILG Provincial Director Virgilio Sison, nga iti kuwalipikasyon dagiti maala a contact tracers ket kasapolan a nagturpos iti anyaman a kurso, nupay prayoridad dagiti addaan ti health related courses ken criminology course.
Iti maudi nga aldaw a panagsumite ti requirements ket inton bigat, Nobyembre 26, alas 12:00 ti aldaw iti DILG provincial office.
