LA UNION – Naninsan manen a nagpalagip ti Department of Interior and Local Government (DILG) Region Office – 1 kadagiti umili maipapan ti maangay a synchronized barangay assembly inton bigat, Marso 31.
Iti interview kenni DILG Regional Office-1 Director James Fadrilan, kinunana a nasken nga adda ti maangay a barangay assembly kas maiyannurot iti Proclamatin No. 260 a kada maudi nga aldaw ti Sabado ket maiganwat daytoy.
Nagkiddaw met daytoy ti pannakaawat gapu ta nairana daytoy iti Sabado de Gloria ngem kasapulan a suruten ti naiyatnag a direktiba.
Namnamaen ti opisyal nga agtungpal dagiti amin a barangay officials nangruna ta umadanin ti Barangay Elections.
