LA UNION – Magagaranen a makaawid dagiti displaced residents iti bukod da a babbalay idiay Marawi City.
Iti eksklusibo nga interview ti Bombo Radyo La Union kenni Sultan Kamlon, maysa nga evacuee iti maysa nga unibersidad idiay Iligan City, kinuna na a maragsakan da iti deklarasyon ni President Rodrigo Duterte a nawayan iti syudad ti Marawi manipud iti terorista nga ISIS-Maute group.
Nupay kasta, kinuna na a pinawilan pay laeng ida ti militar a makasubli iti lugar da gaputa agtultuloy pay laeng iti pannakirinnupak dagitoy iti nabatbati a terorista.
Kinuna ni Kamlon nga idi napan a lawas ket nagturong da iti kapitolyo ti Marawi City tapno kitaen koma dagiti arwaten ken alikamen da iti babbalay, ngem saan nga impalubos ti militar nga agtuloy dagitoy gaputa peligro pay laeng iti kinatalged da gapu kadagiti stray bullet, ken maipagarop nga adun ti natay ditoy.
