Inlawlawag ni Defense Secretary Gilberto “Gibo” Teodoro Jr. a saan na nga inbagbaga a mabalin a piliten nga agikkat dagiti opisial ti gobierno nga adda ti sabali a kapanunutan iti isyu idiay West Philippine Sea (WPS).
Kenunana, iti maysa nga opisial ket mabalin laeng a pagsungbaten wenno mapilitan nga agikkat iti puesto no adda ti panaglabsing iti linteg wenno agdama a regulasion.
Inlawlawag ni Teodoro nga iti opisial a polisiya ti gobierno maipapan iti West Philippine Sea ket nakabasar iti Administrative Order No. 29, Series of 2012, a nangkeddeng iti panagusar ti West Philippine Sea para kadagiti maritime area iti makinlaud a paset ti pagilian.
Gapu ti daytoy, kenunana a trabaho dagiti amin nga opisial ti gobierno a suruten ken depensaran iti agdama a linteg ken iti Konstitusion.
Segun ti sekretario, no adda ti opisial a saan nga umanamong iti nasao a polisiya, mabalin da a kuestionaran daytoy iti korte tapno madesisionan no daytoy ket mailabsing iti Konstitusion.
Nupay kasta, aginggana awan ti pinal a desision iti korte, obligado da a sumurot iti agdama a linteg. No saan daytoy a maituno iti konsensiada, kenunana nga iti nabatbati nga opsion ket iti boluntario a panagikkat iti puesto.
Inpaganetget met ni Teodoro iti kinapateg ti panagkaykaysa dagiti opisial ti gobierno iti tengnga ti agtultuloy a panangidepensa ti Pilipinas kadagiti karbengan daytoy idiay West Philippine Sea, karaman dagiti addang nga itantandudo ti Department of Foreign Affairs iti international community.
Kagiddan ditoy, nagpanawagan isuna iti publiko a basaen iti pakabuklan nga statement na ken saan nga agdependir laeng kadagiti headline a mabalin a mangipaay ti biddut a konteksto iti inbagana.###
