Agtalinaed ti panagtalek ni Defense Sec. Gilberto Teodoro Jr. a tungpalen ti Estados Unidos ti karina iti Pilipinas apaman nga agturong iti nakaro a krisis ti kasasaad idiay West Philippine Sea.
Segun kenni Teodoro, mapasamak laeng daytoy no pagtalinaeden ti Pilipinas ti panagbalin a kalmado ken saan nga agaramid iti aniaman nga addang a mangdadael iti takderna a mangrisut iti nakapia a wagas.
Innayonna pay nga awan ti agbaliw iti kari ti US a mangtulong iti Pilipinas agingga saan a maamyendaran ti United Nations Convention on the Law of the Sea (UNLCOS).
Idi napagsaludsodan daytoy, nu bilang saan a maliklikan ti komprontasyon iti China babaen kadagiti armado a pamay-an, agtalek ti Sekretario a saan daytoy nga ipalubos ti Pilipinas kasta met dagiti kaaliadona a pagilian.
Inaramid ni Teodoro ti nasao nga statement kagiddan ti maika-10 a tawen ti panagballigi ti Pilipinas iti Permanent Court of Arbitration kontra iti China iti isyu ti territorial dispute iti West Philippine Sea.











