Agtaltalinaed nga umdas iti suplay ti petroleo iti pagilian, isu nga awan ti plano ti Department of Energy (DOE) nga agangkat ti lana.
Segun kenni Energy Secretary Sharon Garin, saanen a kasapulan ti baro a fuel order gapu ta umdasen iti suplay ken limitado dagiti storage facilities.
Agarup 150 million a litro ti diesel iti naiproseso kas buffer.
Maibatay iti datos ti DOE, addaan ti supply iti pagilian para ti 53 nga aldaw—52.64 nga aldaw para iti gasolina, 54.58 nga aldaw para iti diesel, ken 166.67 nga aldaw para iti kerosene.
Nupay kasta, manamnama a ngumato ti presio ti liquefied petroleum gas (LPG) ita a bulan ti P1.33 tunggal kilo wenno ₱13.42 tunggal 11-kilogram cylinder.
Kabayatanna, impasigurado ti DOE nga umdas iti suplay ti koriente uray iti panawen ti kalgaw ken agtultuloy ti panangmonitor iti pagkasapulan tapno maliklikan ti panagkurang.###
