Mangnamnama ni Department of Energy (DOE) Secretary Sharon Garin a mausaren iti kabiitan a panawen iti Malampaya East-1 (MAE-1) tapno makatulong iti kumarkaro nga oil crisis iti pagilian.
Iti interview ti Bombo Radyo kenni Secretary Garin seknan iti posibilidad a mausar a dagos iti baro a takuat a gas reserve no agbayag pay ti sumagmamano a bulan iti gubat idiay Middle East, kenuna ti sekretaryo a mangnamnama isuna a maaramid daytoy ti gobierno ken dagiti pribado nga investor, kangrunaan ta naannayas iti taray ti nalawa nga exploration ken development iti Malampaya Gas Field.
Palawag ni Garin, agserserbi a proteksion iti oil industry ti Pilpinas iti Malampaya gapu ta addaan daytoy ti lokal a reserba ken saan a kasapulanen iti agangkat manipud kadagiti oil-producing countries.
Nupay kasta ket inlawlawagna a saan pay a sigurado no maiyannatup daytoy iti energy mix ti pagilian gapu ta kasapulan pay nga urnusen dagiti amin a teknikal nga isyu mainaig ditoy.
Nakikoordinar metten iti gobierno kadagiti investors ti gas field tapno adalen no mabalin a mapapartak iti proseso tapno naan-anayen a mausar.
Idi Enero 19, 2026, impadamag ni Presidente Ferdinand Marcos Jr. iti pannakatakuat ti agingga 98 billion cubic feet ti natural gas iti lugar.
Sipud idi ket pinapigsa ti Armed Forces of the Philippines iti panagbantay kangrunaan ta asideg daytoy kadagiti teritoryo ti Pilipinas a tinagikua ti China.
Ti Malampaya East-1 ket masarakan lima kilometro iti Daya ti Malampaya Gas Field.###
