LA UNION – Agtultuloy dagiti ar-aramiden nga addang ken kampanya ti Department of Health (DoH)-Region One tapno malapdan ti panagadu dagiti makap-kaptan ti sakit a dengue.
Kinuna iti Bombo Radyo La Union ni DoH Region-1 Director Valeriano Lopez, mangisayangkat da ti ebalwasyon kadagiti LGU hospitals iti sumaruno a lawas, kalpasan nga impangato ti ahensiya iti National Dengue Epidemic manipud National Dengue Alert, gaputi napaspas a panagadu dagiti makapkaptan iti sakit a dengue.
Nairanta kunana ti nasao nga ebalwasyon tapno maamwan iti pagkasapolan dagiti LGU hospitals para iti mas naparpartak a panagresponde kadagiti dengue patients.
Nagpanawagan pay ni Lopez kadagiti dumdumngeg iti Bombo Radyo a makitinnulong iti panangparmek dagiti dengue-carrying mosquitoes babaen iti panagdalus iti aglawlaw, tapno malapdan ti panaglobo dagiti makap-kaptan iti makapatay a sakit a dengue.
Manipud Enero agingga Hulyo 20 ita a tawen, nakailistan ti ahensiya iti 4,396 cases iti intero a Region-1 a limbes iti makunkuna nga alert threshold level.
