LA UNION – Dumanonen iti 65 dagiti nailista a suicide cases wenno panagpakamatay iti intero a rehiyon uno, manipud Enero agingga Oktubre ita a tawen, kas maibasar iti datus manipud Department of Health (DOH) Region One.
Manipud iti nasao a bilang, 26 a kaso ket manipud probinsiya ti Pangasinan; 14 ditoy La Union; 15 idiay Ilocos Norte; ken 10 a kaso idiay Ilocos sur.
Ad-adu iti lallaki kumpara dagiti babbai, nga agtawen ti 24 agingga 54-anyos iti nagpakamatay.
Rumrumwar pay iti nasao a report, a dagiti suicide cases ket gapwanan ti problema iti pamilya, ayat, ipupusay iti ipatpateg ti biag, personal a problema, kinakurapay, Covid-19-related, mental illness, ken dadduma pay.
Mainaig ti daytoy, impasigurado ti DOH Region 1 nga agtultuloy iti panangtamingda kadagiti mental health issues ditoy rehiyon iti tengnga ti pandemya.
Daytoy ket babaen iti Tara Usap Tayo Hotline, a naiyuswat idi bulan ti Hunyo kasaruno iti ngimmatu a depression cases ken suicide incidents ditoy rehiyon.
Segun iti DOH Region 1, dagiti tumawtawag iti hotline a (09618151416 ken 09454914447) ket as-asistaran dagiti registered psychometricians ken psychologists.
