LA UNION – Kinumpirma ti Department of Health (DOH-RO1) ken Ilocos Training and Regional Medical Center (ITRMC) ditoy syudad ti San Fernando, La Union nga iti agdama ket awan pay ti patients under investigation (PUIs) iti rehiyon uno mainaig pay laeng iti novel coronavirus acute respiratory disease (2019-nCoV ARD).
Daytoy ket kalpasan a nakaawid metten dagiti immunan a naipadamag a nailista a PUIs, nga addan iti natalged a kondisyon.
Iti naisayangkat a press conference idi kalman, siniguro ni ITRMC medical center chief Dr. Eduardo M. Badua, a nakasagana dagiti isolation room kasta metten dagiti na-train a nurses ken medical staff, ingkaso nga adda maatap ken makitaan ti sintomas ti nCoV ARD.
Uray dagiti facilities kadagiti ospital ditoy rehiyon uno partikular iti quarantine sector ket agtultuloy iti panangipatungpal ti preventive measures kontra iti nasao a virus.
Segun kenni Dr. Badua, iti ITRMC ket kasapolan a dumalan ti amin iti handheld scanner tapno amwen ti temperatura ken ma-detect nu adda dagiti nakaptan ti respiratory disease.
