Imbutaktak ni Department of Justice (DOJ) Secretary Jesus Crispin Remulla nga adda man iggem dan a baro a testigo mainaig ti kaso dagiti missing sabungeros, malaksid pay kenni Julie Patidongan, alias Totoy.
Nupay kasta, nagkedked paylaeng iti sekretaryo a naganan wenno iwaragawag iti pakabigbigan ti baro a testigo, ngem kinuna a maamoan tu metlaeng iti publiko dagiti ammo seknan ti kaso iti kabiitan a panawen.
Innayon na a saan laeng a basta testimonya iti imet ti testigo nu di ket sigurado nga ebidensya a mangpatibker pay lalo kadagiti immun-una a rebelasyon ni alias Totoy.
Kabayatanna, kasaruno met ti panagbisita ni Philippine National Police (PNP) Chief General Nicolas Torre III idiay Department of Justice ket pinasingkedan manen ni Remulla ti pannakaikkat ti maysa a ‘service commander’ ti kapulisan.
Inlawlawag na a naikkat daitoy iti puesto agsipud ta saan a maiparbeng dagiti galad na iti maisaysayangkat nga imbestigasyon mainaig iti kaso.
Napateg kunana iti kaadda ti talek, nangruna para ti panagproseso ken panagresolbar ti kaso nu kasta ket nawaya a makasao dagiti dadduma a panggep da a damagen iti agtultuloy nga imbestigasyon.
