Pinasingkedan ti Department of Justice nga adda iti kitkitaen dan a potensyal a ‘whistleblower’ mainaig kadagiti maanomalya a ‘flood control projects’.
Kinuna ni Justice Secretary Jesus Crispin Remulla nga immasideg iti abogado na ti representante ti maysa a ‘whistleblower’ nga adu ti ammo na maipanggep iti isyu.
Inbinglay daitoy dagiti napapateg nga impormasyon nu kasatno iti bingay ti pondo dagiti contractors ken politiko a nagnumar kadagiti proyekto.
Innayon pay ti Justice Secretary nga ammo pay daitoy nga indibidwal dagiti iregularidad iti kontrata partikular dagiti proyekto a nakabase idiay Central Luzon nga aggatad ti aganay P5-B.
Nupay addaan iti potensyal ket ur-urayen paylaeng ti sekretaryo dagiti ilatag na nga ebidensya agsipud ta saan pay a sigurado agingga iti agdama nu agtuloy metlaeng iti “whistleblower” a mangibutaktak kadagiti ammo na wenno saan.
